Ymunwch a'r Clwb 100 newydd gwelch yma am fyw o fanylion

Cyflwyniad

Mae Dolgellau, tref farchnad ddeniadol (pob. 3,000) wrth droed Cader Idris yn Eryri, yn falch o'i bywyd diwylliannol bywiog, yn enwedig yn ystod misoedd y gaeaf. Ac mae Clwb Cerdd Dolgellau wedi dod yn rhan gynyddol bwysig yn y diwylliant hwn, ac mae llawer o bobl yn edrych ymlaen yn eiddgar at y cyfresi o gyngherddau y gellir tanysgrifio iddynt a gynhelir pan fo'r dyddiau yn byrhau.

Gorchwyl y Clwb yw i gyflwyno cyngherddau o safon uchel ac o gynnwys amrywiol, clasurol gan mwyaf, ond gyda pheth elfen o ganu gwerin/jazz/ethnig. Mae hefyd yn trefnu gweithdai cysylltiol â rhai o'r cyngherddau, ar gyfer ieuenctid yn fwyaf arbennig ond gyda chyfleon i oedolion yn ogystal. Yn ychwanegol at hyn ceir anerchiad blynyddol i egluro eitemau cerddorol un cyngerdd penodol. Trwy hyn oll fe gyfoethogir mwynhad a deallusrwydd cerddorol y gymuned.

Pobl o statws proffesiynol uchel yw'r perfformwyr a wahoddir i'r Clwb, llawer ohonynt yn fyd-enwog - pianyddion megis John Leneham, Allan Schiller ac Angela Brownridge yn esiamplau a ddônt i'r cof. Cychwyn ar eu gyrfa y mae rhai, ac ânt ymlaen i ennill enwogrwydd yn fuan wedi iddynt ymddangos ar lwyfan y Clwb. Esiampl nodedig o hynny yw'r Pedwarawd Belcea, a ddaethant i berfformio yn Nolgellau yn Chwefror 1999 (pan gyflwynwyd perfformiad gwefreiddiol o 3ydd Pedwarawd Llinynnol Bartok), ac eisoes gwelir fod y pedwarawd yma ymysg y rhai mwyaf poblogaidd ym Mhrydain.

Hyderwn y byddwch yn cael y wefan hon yn ddiddorol ac o gymorth ichwi, pe byddech un ai â rhesymau proffesiynol i sgrolio trwyddi fel perfformydd, hyrwyddwr neu asiant, neu pe byddech yn unig yn hoff o gerddoriaeth, neu yn ymwelydd â'r ardal ac yn edrych am rhywbeth a fyddai yn apelio atoch.